सर्लाही । सर्लाहीको ब्रम्हपुरी गाउँपालिका ३ स्थित पुर्वपश्चिम हुलाकी सडक निर्माणमा ढिला सुस्ती भएको भन्दै स्थानीय आन्दोलित भएका छन् । पुर्व पश्चिम हुलाकी सडक निर्माणमा ढिलासुस्ती हुँदा वर्षामा हिलाम्य र हिउँदमा धुलाम्य हुँदा आफूहरु सास्ती बेहोर्न बाध्य भएकोले आन्दोलन गर्नु परेको ब्रम्हपुरी गाउँपालिका ३ का वडा अध्यक्ष गौतम रायले बताउनुभयो ।

वडा अध्यक्ष रायको नेतृत्वमा करिब २ सय स्थानियले हुलाकी सडक खण्डको ब्रम्हपुरी गाउँपालिका ३ स्थित भेल्ही चोकमा आइतबार बिहानदेखि टायर बालेर शान्तिपूर्ण रुपमा प्रदर्शन गरेका हुन् । उहाँका अनुसार स्थानियको प्रदर्शनका कारण आइतबार बिहानदेखि पुर्व पश्चिम हुलाकी सडकमा आवतजावत बन्द भएको छ ।

तराईको लाईफलाइन मानिएको हुलाकी राजमार्ग निर्माणमा लापरवाही गरेको र जनताको स्वास्थ्यमा खेलवाड गरेको भन्दै स्थानिय युवाहरूले ठेकेदार कम्पनीको बिरुद्धमा प्रदर्शन गरेको स्थानिय मुकेश यादवले बताउनुभयो ।

उहाँका अनुसार हुलाकी राजमार्ग समयमै बनाउने भनेर प्रतिवद्धता गर्ने र अलपत्र छाड्ने गरेको कारण नेता र नेतृत्वबाट पटक पटक धोका भएकोले आवात जावतमै रोक लगाउने निर्णय गरेर आफूहरु सडक अवरुद्ध गर्न बाध्य भएको बताउनु भयो ।

समयमै बनाउन नसकिएपनि सडकमा नियमित पानी छर्केर धूलो उड्न रोक्ने कार्य समेत नगरेको भन्दै सडकमा उड्ने धुलोका कारण नागरिकको स्वास्थ्यमा नकरात्मक असर परिरहेको अर्का स्थानिय कपिल यादवले बताउनु भयो ।

उहाँका अनुसार सडक नबन्दा तराईका हजारौं बासिन्दाले यात्रामा कठिनाई भोग्नु परीरहेको छ । प्रशासनले समेत हुलाकी सडक नबनाउने ठेकेदारलाई कुनै कारवाही नगरेको भन्दै अब जनताले नै निर्णय गर्ने बेला आएकोले आफूहरु सडक अवरुद्ध गर्न अघि बढेको स्थानीय आन्दोलनकारीले बताएका छन् ।

तत्काल सडकमा पानी छर्कने काम गरे र सडक छिट्टै बनाउने प्रतिवद्धता मात्रै भए पनि सडक खुलाउने आन्दोलनको नेतृत्व गरि रहनु भएका वडा अध्यक्ष रायले बताउनु भयो । उहाँका अनुसार स्थानिय प्रहरी प्रशासन छलफल मार्फत बन्द खुलाउने कार्यमा लागि सकेको छ ।