भक्तपुर । खाना पकाउने एलपी ग्यास विस्फोट हुँदा भक्तपुरमा एक जना घाइते भएका छन् । सूर्यविनायक नगरपालिका ३ बालकोटमा ग्यास सिलिण्डर पड्केर तारा घले थपलिया घाइते भएकी हुन् ।
भक्तपुर प्रहरीले जनाएअनुसार स्थानीय रामप्रसाद थपलियाको घरको बाहिरको भान्सा कोठामा ग्यास सिलिण्डरबाट लिक भएर विस्फोट भएको हो । विस्फोटबाट रामप्रसादकी श्रीमती तारा घले घाइते भएकी हुन् ।
उनको अवस्था सामान्य रहेको प्रहरीले जनाएको छ । विस्फोटबाट भान्साको वाल, सिसा लगायत पार्किङमा रहेको गाडीको सिसामा समेत क्षति पुगेको भक्तपुर प्रहरी परिसरका सूचना अधिकृत राजु पाण्डेले जनाएको छ ।
