सुर्खेत । जुम्लामा जीप दुर्घटना हुँदा एक जनाको मृत्यु भएको छ । जुम्ला बजारबाट पातरासी गाउँपालिकाको लासी जाँदै गरेको जीप दुर्घटना हुँदा एक जनाको घटनस्थलमै मृत्यु भएको हो । दुर्घटनामा १४ जना घाइते भएका छन् ।
दुई जनाको अवस्था गम्भीर रहेको कर्णाली स्वास्थ्य विज्ञान प्रतिष्ठानले जनाएको छ । सोमबार अपराह्न ४ बजे पातरासी गाउँपालिका ६ स्थित कोटाभीर भन्ने ठाउँमा ग १ ज ४०३५ नम्बरको जीप दुर्घटना भएको हो ।
उक्त दुर्घटनामा पातरासी गाउँपालिका १ खालाढिक बस्ने छोजुम लामाको घटनास्थलमै मृत्यु भएको हो । घाइते सबैलाई उपचारका लागि कर्णाली स्वास्थ्य विज्ञान प्रतिष्ठानमा लागिएको छ ।
प्रहरी घटनास्थलमा पुग्नुभन्दा पहिले नै घाइतेहरूलाई स्थानीयले उद्धार गरी अस्पताल पठाएको जिल्ला प्रहरी कार्यालय जुम्लाले जनाएको छ । जीप ब्याक गर्ने क्रममा सडकबाट ५० मिटर तल तिला नदीमा खसेको स्थानीयहरूले बताएका छन् ।
