विराटनगर । हाइपोथर्मिया भएका १८ दिनका जिउँदो शिशुलाई मृत घोषणा गर्ने चिकित्सक माथि कुटपिट भएको छ । जीवित छोरीलाई मृत घोषणा गरेपछि आफन्तले कोसी अस्पताल विराटनगरका चिकित्सक आकाश यादवलाई कुटपिट गरेका हुन् ।
मोरङको जहदा गाउँपालिका वडा नम्बर ३ भात्तिगन्जकी उमा मुखियाको कुटपिटबाट यादवको टाउकोमा चोट लागेको छ । घटनामा संलग्न तीन जना मनोज मुखिया, मन्नु मुखिया र नाम नखुलेको अर्का एक व्यक्तिलाई प्रहरीले नियन्त्रणमा लिएको छ ।
नवजात छोरी अचानक बिरामी भएपछि बुबा दिलीप मुखिया र आमा उमा बुधबार बिहान कोसी अस्पताल उपचारार्थ भर्ना गरेका थिए । इमरजेन्समा भर्ना गरेपछि डा. आकाश यादवसहितको टोलीले चेकजाँच गरेपछि बच्चाको मृत्यु भएको भन्दै घर लैजान भनेका थिए । तर, बच्चा बोकेर जाँदा पेट चलेको देखियो ।
मृत घोषणा गरिएकी छोरीलाई लगत्तै नजिकैको गोल्डेन अस्पतालमा लगेर उपचार सुरु गरेको र अहिले एनआईसीयूमा राखेर उपचार भइरहेको छ । अहिले शिशुको स्वास्थ्य क्रमीक रूपमा सुधार भइरहेको छ ।
यसैबीच घटना बारे प्रतिक्रिया लिन कोसी अस्पताल पुगेका पत्रकार माथि मेसु लक्ष्मी नारायण यादवले हातपात गरेका छन् । लाइभ रफ्तार अनलाइनका पत्रकार सोनु कुमार दासलाई यादवले धकेल्दै कार्यकक्ष बाहिर लगेको दासले बताए ।
