तनहुँ । तनहुँको घिरिङ गाउँपालिका–३, सुन्धारामा प्रधानाध्यापकको कुटपिटबाट विद्यार्थी घाइते भएका छन् । चन्द्रज्योति माध्यमिक विद्यालयका प्रधानाध्यापक प्रेमबहादुर थापाले एसईईको तयारीमा रहेका कक्षा १० का विद्यार्थीलाई काठको लठ्ठीले प्रहार गर्दा १५ वर्षीया लिला आले घाइते भएकी हुन् ।
प्रधानाध्यापक आलेको कुटाइबाट घाइते भएकी आलेको जीपी कोइराला राष्ट्रिय श्वासप्रश्वास उपचार केन्द्र बेलचौतरा झरौटामा उपचार भइरहेको छ । उनको पिठ्युमा लठ्ठीको डाम बसेको छ । लठ्ठी प्रहारबाट देब्रे खुट्टा टेक्न र बस्न समेत नसकेकी आलेलाई एम्बुलेन्समा राखेर सोमबार बिहान अस्पताल ल्याइएको थियो ।
घटना आइतबार भएको हो । बिहानै अभिभावक विद्यालय पुगेपछि प्रधानाध्यापक थापाले नै समन्वय गरी एम्बुलेन्समा हालेर लिलालाई उपचारका लागि अस्पताल पठाएका थिए । उक्त विद्यालयको कक्षा १० मा अध्ययनरत ४२ जना विद्यार्थीमध्ये ६/७ जनाबाहेक सबैले कुटाइ खाएको पीडित विद्यार्थीहरूले बताएका छन् ।
घाइते लिलाका अनुसार कक्षागत मुल्यांकनमा आफूले भनेजति प्राप्तांक नल्याएको भन्दै प्रधानाध्यापक थापाले १३/१४ पटकसम्म लठ्ठीले हानेका थिए । उनका अनुसार अर्की एक जना साथी पनि उनी जस्तै घाइते छिन् । तर उनी हिँड्न सक्ने भएकाले घरमै आराम गरिरहेको छिन् ।
लिलाले आइतबार राती सुत्ने बेलामा आमालाई फोन गरेर सरले कुटेको जानकारी गराउँदै आफूलाई लिन बोलाएकी थिइन् । लिलाकी आमाले घटना बारे इलाका प्रहरी कार्यालय भिमादमा निवेदन दिएका छन् । प्रहरीमा निवेदन दिएपछि थापाका अनुसार प्रधानाध्यापक थापाले फोन गरेर स्कुलमै मिल्न दबाब दिएका छन् ।
यता, प्रधानाध्यापक थापाले विद्यार्थीहरूलाई आफूले लठ्ठीले कुटेको स्वीकार गरेका छन् । तर उनले नियतवशभन्दा पनि विद्यार्थीहरूलाई आफूले भनेजति नम्बर नल्याए एउटा प्रश्न बराबर एक लठ्ठी हिर्काउने भनेर सहमति गराएको बताउँछन् ।
आफूले कुटेको कारण विद्यार्थी अस्पताल भर्ना नभएर पुरानो बिमार (कोखा दुख्ने) समस्याले गर्दा भर्ना हुनु परेको प्रधानाध्यापक थापाको भनाइ छ । तर, आफूले गल्ती महसुस गरेको भन्दै अब विद्यार्थी नकुट्ने बताएका छन् ।
