काठमाडौं । नेपालको पहिलो र एक मात्र संसदीय प्रणाली शैलीको वादविवादमा आधारित टिभि रियालिटि शो ‘डिबेट स्टार’को पहिलो सिजनका विजेता घोषणा गरिएको छ ।

काठमाडौंको राष्ट्रिय नाँचघरमा विशेष कार्यक्रम गरी विजेता घोषणा गरिएको हो । डिभेट स्टारका विजेता केशब राना भए भने फस्ट रनरअप विजय घिमिरे भए । त्यसैगरी सेकेण्ड रनरअप प्रज्ञा ढकाल भइन् ।

त्यस्तै बेस्ट स्पिकरको पुरस्कार नकुल चौलागाइँ र निराजन लामाले हात पारे । विजेतालाई नेपाली कांग्रेसका उपसभापति धनराज गुरुङको हातबाट पुरस्कार वितरण गरिएको थियो ।

उत्कृष्ठ दशभित्र पर्न सफल सबैलाई मायाको चिनो प्रदान गरिएको थियो । युवा नेता जन्माउने उद्धेश्यले गरिएको प्रतिस्पर्धामक कार्यक्रम न्युज २४ टेलिभिजनबाट प्रशारण गरिएको थियो ।

कार्यक्रम केही महिनाअघि नै सम्पन्न भए पनि कोरोना महामारीका कारण हिजो समापन गरिएको हो । कार्यक्रममा नेपाल शैक्षिक परामर्श संघका उपाध्यक्ष शेषराज भट्टराईले शुभकामना व्यक्त गरेका थिए ।

कार्यक्रमको निर्णायकहरुमा राजनीतिक विश्लेषक डा. सुरेन्द्र केसी, रमेश सिलवाल र अभिनेत्री संचिता लुइटेल रहेकी थिइन् । अब डिबेट स्टारको दोस्रो सिजन छिटै ल्याइने आयोजक संस्था अभियान मल्टिमिडियाका अध्यक्ष मिन अधिकारीले जानकारी दिए ।

कार्यक्रमको टाइटल स्पोन्सर शैक्षिक परामर्श कम्पनी एजुकेसन पार्क थियो । सबै विज्ञापनदातालाई धन्यवाद दिँदै अध्यक्ष अधिकारीले दोस्रो सिजन थप परिस्कृत र भव्य बनाउने घोषणा गरेका छन् ।