एजेन्सी । कोलकाता नाइट राइडर्सले इन्डियन प्रिमियर लिग (आइपीएल) २०२२ को पहिलो खेलमा चेन्नई सुपर किंग्सलाई ६ विकेटले पराजित गरेको छ । उद्धघाटन खेलमा कोलकाताले ४ पटकको विजेता चेन्नईलाई हराउँदै विजयी सुरुवात गरेको हो ।
१ सय ३२ रनको विजयी लक्ष्य कोलकाताले १८.३ ओभरमा ४ विकेट गुमाउँदै पूरा गर्यो । कोलकाताको जितमा ओपनर तथा अनुभवी खेलाडी अजिक्या रहाणेले ३४ बलमा ६ चौका र १ छक्कासहित सर्वाधिक ४४ रनको योगदान दिए ।
कप्तान श्रेयस ऐर २० बलमा १ चौकासहित २० रनमा अविजित रहे ।ओपनर वेंकटेर ऐर १६, नितिश राणा २१ र साम बिलिंग्स २५ रनमा आउट भए । बिलिंग्सले २१ बलमा १ चौका र १ छक्का प्रहार गरे । चेन्नईका ड्वेन ब्राभोले ४ ओभरमा २० रन खर्चेर ३ विकेट लिए । यो सँगै ब्राभो आइपीएल इतिहासमा सवाधिक विकेट लिने खेलाडी मालिंगासँग बराबरी गरेका छन् । दुबै खेलाडीले समान १७० विकेट लिएका छन् ।
त्यस्तै, मिचेल सान्टनारको नाममा १ विकेट रह्यो । त्यसअघि वानखडे स्टेडियम मुम्बईमा टस हारेर ब्याटिङ थालेको चेन्नईले निर्धारित २० ओभरमा ५ विकेट गुमाउँदै १ सय ३१ रन बनाएको थियो । चेन्नईका पूर्व कप्तान महेन्द्रसिंह धोनी ३८ बलमा ७ चौका र १ छक्कासहित सर्वाधिक ५० रनमा अविजित रहे ।
चेन्नईमा पहिलो पटक धोनी कप्तान विनाको भूमिकाबाट खेलेका हुन् । सन् २००८ देखि कप्तानी गर्दै आएका धोनीले यस सिजनमा रविन्द्र जडेजालाई हस्तान्तरण गरेका हुन् । चेन्नईलाई ४ उपाधि दिलाएका धोनीले जडेजालाई तयार पार्न कप्तान छाडेका हुन् ।
डेब्यू कप्तानी गरेका जडेजा २८ बलमा १ छक्कासहित २६ रनमा अविजित रहे । खराब प्रदर्शन गरेको चेन्नईलाई छैटौं विकेटका लागि धोनी र जडेजाले ७० रनको अविजित साझेदारी गरेका थिए । रोबिन उथप्पाले २१ बलमा २ चौका र २ छक्कासहित २८ रन बनाए ।
तीव्र गतिका बलर उमेश यादवले पहिलो ओभरको तेस्रो बलमा ओपनर ऋतुराज गायकवाडलाई शून्यमा नितिश राणाबाट क्याच गराए । युवा स्टार गायकवाड एज लागेर स्लिपमा क्याच हुन पुगे । यादवकै चौथो ओभरको पहिलो बलमा डेभन कन्वे कप्तान श्रेयस ऐरबाट ३ रनमा क्याच भए ।
स्पिनर बरुण चक्रवर्तीको बलमा उथप्पा विकेटकिपर शेल्डन ज्याकसनबाट स्टम्पिङ आउट भए । अम्बाती रायूडु १५ रनमा रन आउट हुँदा शिवम दुबे ३ रनमा क्याच आउट भए । कोलकाताका उमेश यादवले ४ ओभरमा २० रन खर्चेर २ विकेट लिए । बरुण चक्रवर्ती र आन्द्रे रसेलले १–१ विकेट लिए ।
चेन्नईले अब ३१ मार्चमा लखनऊ सुपर जायन्ट्सविरुद्ध खेल्नेछ । कोलकाताले ३० मार्चमा रोयल च्यालेन्जर्स बेंगलोरसँग खेल्नेछ । आइतबार दिउँसो दिल्ली क्यापिटल्स र मुम्बईबीच प्रतिस्पर्धा हुनेछ । साँझ पन्जाब किंग्स र बेंगलोरबीच प्रतिस्पर्धा हुनेछ ।
