एजेन्सी । प्रशान्त नीलद्वारा लिखित तथा निर्देशित कन्नड फिल्म ‘केजिएफ च्याप्टर २’ को कमाइ ९ अर्ब भारतीय रूपैयाँ पुगेको छ । दोस्रो हप्तामा प्रदर्शन भइरहेको फिल्मले ११ दिनमा ९ अर्बको आँकडा छोएको हो ।

१० हजारभन्दा बढी पर्दामा एकसाथ प्रदर्शनमा आएको फिल्मले पहिलो दिन नै १ अर्ब ३० करोडभन्दा बढी कमाइ गरेको थियो । निर्माण टोलीका अनुसार फिल्मले ११ दिनमा विश्वभरिबाट ९ अर्बको कमाइ गरेको छ । योसँगै सबैभन्दा धेरै कमाउने भारतीय फिल्मको सूचीमा ‘केजिएफ २’ छैटौँ नम्बरमा पुगेको छ ।

१ अर्ब बजेटमा बनेको फिल्मले ११ दिनमै ‘पिके’, ‘बजरंगी भाइजान’, ‘बाहुबलीः द बिगिनिङ’ जस्ता सुपरहिट फिल्मको लाइफटाइम बक्स अफिस कलेक्सनलाई पछि पारेको छ । सबैभन्दा बढी कमाउने भारतीय फिल्मको सूचीमा पहिलो नम्बरमा ‘दंगल’ रहेको छ भने ‘बाहुबली २’, ‘आरआरआर’, ‘बजरंगी भाइजान’ र ‘सेक्रेट सुपरस्टार’ क्रमशः दोस्रो, तेस्रो, चौथो र पाँचौँ स्थानमा रहेका छन् ।

‘केजिएफ २’ ले अबको एक हप्तामा ‘बजरंगी भाइजान’ र ‘सेक्रेट सुपरस्टार’लाई पछि पार्ने विश्लेषकहरूले बताएका छन् । ‘केजिएफ २’ को भन्दा ‘बजरंगी भाइजान’को बक्स अफिस कलेक्सन ७० करोड र सेक्रेट सुपरस्टारको कलेक्सन ६६ करोडले बढी छ ।

सन् २०१८ मा प्रदर्शनमा आएको ‘केजिएफ च्याप्टर १’ ले २ अर्ब ५० करोडको कमाइ गर्दै कन्नड फिल्म उद्योगमा सबैभन्दा बढी कमाउने फिल्म बनेको थियो । कन्नड फिल्म उद्योगको लागि च्याप्टर १ को रेकर्ड ब्रेक गर्दै च्याप्टर २ ले नयाँ रकर्ड सेट गरेको छ । फिल्ममा यश राज केन्द्रीय भूमिकामा देखिएका छन् भने सञ्जय दत्त, रविना टन्डन, श्रीनिधि सेट्टी, प्रकाश राज लगायत कलाकारको मुख्य भूमिका रहेको छ ।

त्यस्तै शुक्रवारबाट अभिनेता शाहिद कपूर अभिनीत फिल्म ‘जर्सी’ रिलिज भयो । साउथको सुपरहिट फिल्म ‘जर्सी’को रिमेक भएकाले फिल्मले बक्स अफिसमा राम्रो व्यापार गर्ने धेरैको आँकलन थियो । तर, ‘फिल्मले विकेन्डमा जम्मा १५ करोड मात्र कमाउन सफल भएको छ ।

सन् २०१९ मा आएको अभिनेता शाहिद कपूरको फिल्म ‘कबीर सिंह’ले बक्सअफिसमा २ सय ७५ करोडको व्यापार गरेको थियो । यसको १० प्रतिशत कमाई गर्न पनि ‘जर्सी’का लागि मुश्किल पर्ने देखिन्छ । ४० करोडमा बनेको फिल्मले घरेलु बजारबाट लगानी उठाउने सम्भावना समेत न्यून बनेको छ । फिल्ममा शाहिद कपूरसँगै पंकज कपूर र मृणाल ठाकुर पनि मुख्य भूमिकामा छन् ।